“Bankdan qo‘ng‘iroq”
Kunduz kuni edi. Ishdan chiqib, mashinada ketayotgan edim. +998 bilan boshlangan oddiy raqamdan qo’ng’iroq qilishdi. Ovozi sokin, shevasiz erkak gapirdi:
«Bank xavfsizlik xizmatidanman. Kartangizdan pul yechishga urinish bo‘ldi. Shubhali operatsiyani to‘xtatish uchun hozir SMS kodi keladi, tasdiqlab qo‘ying».
Gaplarida ishonch bor edi. O‘sha paytda hammasi haqiqatdek tuyulgandi. Rulda edim, ko‘p o‘ylashga vaqtim yo‘q edi.
O‘n soniyadan so‘ng SMS keldi. Men kodni aytdim.
Pulning yo‘qolishi
Bir daqiqa o‘tmay telefonim titradi: kartadan yuz ming so‘m yechildi.
Qotib qoldim. Qo‘ng‘iroqdagi odam yana nimanidir gapirayotgan edi, men esa allaqachon shubhalana boshlagandim.
Gapni yakunlab, ilovaga kirib, kartani darhol blokladim. Yaxshiyam, kartamga oylik hali tushmagandi.
Meni qanday aldashdi
- Ular birinchi navbatda sizni vahimaga soladi: “Pulni yechib olishadi, tezda tasdiqlang” deb
- Ovozi sokin, professional, shubha uyg‘otmaydi.
- Meni aynan noqulay paytda ushlashdi — rulda, charchagan va chalg‘igan holatda edim.
Keyin nima qildim
- Darrov bankka qo‘ng‘iroq qildim — bu firibgarlar ekanini aytishdi.
- Kartani blokladim, yangisiga buyurtma berdim.
- Bo‘lgan voqeani esa tanishlarimga aytdim. “Sen ham ehtiyot bo‘l” deb.
Nimani tushundim
O‘zimni “aldatib bo‘lmaydigan” odam deb bilardim. Texnologiyadan xabardorman-ku, axir.
Lekin... rulda edim, charchagan, shoshilinch holatda. Bir daqiqa ichida hammasi o‘zgardi.
Ular baqirmaydi, qo‘rqitmaydi. Juda xotirjam, ishonarli gapiradi.
O‘ylashingiz mumkin: “Meni bunaqa tutib bo‘lmaydi” deb. Men ham shunday deb o‘ylardim.
Buni ogohlantirish deb qabul qiling.
Men yengil qutuldim — 100 ming so‘m. Oylik tushgan kuni bo‘lganida-chi?
Shunchaki yodda tuting:
Sizning boshingizga bunday ish tushmaydi deb o‘ylasangiz, shuni bilingki: men ham xuddi shunday fikrda edim. O‘sha qo‘ng‘iroqqacha.
.webp)
